Mga residente, nagbalikan na sa Shariff Aguak matapos tanggalin ang martial law sa Maguindanao

Ikinalugod ng mga residente ng Maguindanao ang tuluyan nang pagtatanggal sa martial law sa lalawigan. Sa unang araw ng pag-aalis ng martial law sa Maguindanao, maraming mga residente ang nagbalikan na sa kani-kanilang tahanan tulad na lang sa bayan ng Shariff Aguak, kung saan marami ang nagsilikas patungo sa malayong bayan ng Esperanza nang ideklara ang batas-militar sa lalawigan. Bumabalik na rin sa normal ang mga negosyo roon. Sa palengke ng Shariff Aguak, marami na ang mga nagbukas na tindahan taliwas noong ipinatutupad ang martial law roon na halos 85 porsyento, sarado.