KATAWHAN SA LANAO DEL NORTE NAKADAWAT UG MGA AYUDA GIKAN SA GOBYERNO

Tubod, Lanao del Norte, ilawom sa Rehabilitation Component kalabot sa Early Recovery Program alang sa mga lugar nga naapektuhan sa kasamok sa Lanao del Norte, ang Department of Social Welfare and Development (DSWD) pinaagi sa Provincial Social Welfare and Development (PSWDO) ubos sa pagpangulo ni Annabel Mendez, mipang apod-apod sa Cash-For-Work ngadto sa mga trabahante sa gihimong pag-ayo sa dalan sa mga barangay sa Dimayon, Darimbang og Kiazar mga sakop sa lungsod sa Tagoloan dili pa lamang dugay. Ang kantidad nga gipanghatag ngadto sa mga`90 ka mga residente sa nasangpit nga mga barangays mikabat og P172,800 diin ang matag usa ka trabahante gikan sa 90 ka mga nakatrabaho makadawat ug P192 matag adlaw sulod sa napulo ka mga adlaw. Gipahayag sa tinahasan sa PSWDO nga si Abeliza C. Manzano nga dyutay lamang ang kinatibuk-ang benepisyaryo sa nahisgutang mga barangay ang nakapahimulos sa nasangpit nga ayuda gikan sa gobyerno. Sa pikas bahin, si PSWDO head Annabel Mendez namahayag nga ang Cash-For-Work padayong ipatuman hangtud nga ang pundong salapi nga gigahin alang niining maong programa magamit o maapod-apod niadtong mga lumolupyo nga grabing naapektuhan sa armadong kagubot ug mihiklin gikan sa ilang mga pinuy-anan. Nasayran nga kadto lamang mga residente sa mga barangay diin gitrabaho ang kalsada, giayo ang tulay, ug uban pang mga proyektong pang imprastraktura sa gobyerno gikatahong maoy gihatagan ug prayoridad nga makatrabaho ilawom sa CaSH-For-Work Program. Ang maong programa kabahin gihapon sa paningkamot ni Governor Mohamad Khalid Dimaporo subay sa iyang 3-Point-Agenda on Social Development, Infrastracture and Rural Livelihood.(rng)